꧁ ꦱꦼꦫꦠ꧀ ꦢꦺꦮꦫꦸꦕꦶ ꧂
꧅ ꧉ ꦧ꧀ꦖ ꧉ ꧅ ꦤꦶꦲꦤ꧀ꦢꦺꦴꦤ꧀ꦤꦶꦁꦔꦸꦭꦸꦤ꧀ꦩꦤꦸꦭꦠ꧀ꦱꦿꦶ꧈ ꦩꦿꦶꦁꦱꦂꦏꦫꦩꦩꦿꦶꦃꦩꦩꦂꦢ꧀ꦢꦮ꧈ ꦠꦾꦱ꧀ꦮꦶꦒꦼꦤ꧀ꦤꦥꦚ꧀ꦗꦸꦠꦤ꧀ꦤꦺ꧈ ꦗꦸꦮꦼꦠ꧀ꦱꦶꦭꦂꦗꦺꦁꦠꦸꦮꦸꦃ꧈ ꦮꦲꦤꦤ꧀ꦤꦶꦁꦏꦲꦤꦤ꧀ꦗꦠꦶ꧈ ꦱꦸꦗꦤꦥꦫꦩꦂꦠ꧈ ꦮꦶꦠꦤ꧀ꦤꦶꦁꦠꦸꦩꦸꦮꦸꦃ꧈ ꦮꦶꦤ꧀ꦤꦔꦸꦤ꧀ꦤꦶꦁꦏꦁꦱꦱ꧀ꦩꦶꦠ꧈ ꦒꦶꦤꦸꦥꦶꦠꦲꦶꦁꦏꦮꦶꦫꦺꦃꦧꦶꦩꦱꦸꦕꦶ꧈ ꦮꦶꦤ꧀ꦤꦔꦸꦤ꧀ꦭꦮꦤ꧀ꦗꦂꦮ꧉
꧃ ꦮꦽꦏꦺꦴꦝꦫꦢꦸꦏ꧀ꦥꦸꦫꦸꦲꦶꦠꦩꦿꦶꦁ꧈ ꦝꦚꦁꦢꦸꦂꦟꦏꦶꦤꦺꦤ꧀ꦔꦸꦥꦪꦲ꧈ ꦠꦺꦴꦪꦲꦶꦁꦏꦁꦤꦸꦕꦺꦏ꧀ꦲꦏꦺ꧈ ꦩꦫꦁꦱꦫꦶꦫꦤ꧀ꦤꦶꦥꦸꦤ꧀ ꦮꦽꦏꦺꦴꦝꦫꦩꦤ꧀ꦠꦸꦏ꧀ꦮꦮꦂꦠꦶ꧈ ꦩꦫꦶꦁꦤꦒꦿꦶꦔꦩꦂꦡ꧈ ꦥꦩꦶꦠ꧀ꦏꦢꦁꦱꦼꦥꦸꦃ꧈ ꦱꦶꦫꦦꦿꦨꦸꦪꦸꦝꦶꦰ꧀ꦛꦶꦫ꧈ ꦏꦁꦥꦫꦫꦶꦱꦢꦪꦤꦸꦗꦸꦩꦉꦁꦔꦶ꧈ ꦲꦤꦺꦁꦔꦂꦱꦤꦶꦁꦫꦏ꧉ ꧃ ꦲꦂꦪꦯꦺꦟꦩꦠꦸꦂꦲꦶꦁꦫꦏꦗꦶ꧈ ꦭꦩꦸꦤ꧀ꦲꦂꦱꦏꦺꦱꦃꦩꦩꦿꦶꦃꦠꦺꦴꦪ꧈ ꦢꦺꦤ꧀ꦤꦶꦁꦒꦸꦫꦸꦥꦶꦠꦸꦢꦸꦃꦲꦺ꧈ ꦱꦿꦶꦢꦂꦩꦦꦸꦠꦿꦔꦸꦔꦸꦤ꧀ ꦲꦩꦶꦪꦂꦱꦲꦠꦸꦂꦫꦶꦔꦫꦶ꧈ ꦕꦶꦤ꧀ꦤꦶꦥ꧀ꦠꦥꦿꦥ꧀ꦠꦺꦁꦧꦪ꧈ ꦟꦫꦺꦟ꧀ꦢꦿꦩꦔꦸꦤ꧀ꦏꦸꦁ꧈ ꦢꦾꦤ꧀ꦱꦠꦿꦶꦪꦢꦟꦚ꧀ꦗꦪ꧈ ꦩꦠꦸꦂꦤꦼꦩ꧀ꦧꦃꦲꦶꦁꦫꦏꦯꦿꦶꦟꦫꦦꦡꦶ꧈ ꦥꦸꦤ꧀ꦤꦶꦏꦠꦤ꧀ꦱꦏꦺꦕ꧉ ꧃ ꦲꦶꦁꦒꦶꦃꦱꦩ꧀ꦥꦸꦤ꧀ꦥꦢꦸꦏꦭꦶꦭꦤ꧀ꦤꦶ꧈ ꦫꦪꦶꦢꦊꦩ꧀ꦏꦺꦱꦃꦲꦺꦥꦸꦤ꧀ꦤꦶꦏ꧈ ꦧꦺꦴꦠꦼꦤ꧀ꦱꦏꦺꦕ ꦫꦲꦺꦴꦱ꧀ꦱꦺ꧈ ꦲꦂꦪꦏꦭꦶꦃꦮꦺꦴꦠ꧀ꦱꦤ꧀ꦠꦸꦤ꧀ ꦲꦶꦁꦒꦶꦃꦱꦩ꧀ꦥꦸꦤ꧀ꦠꦸꦮꦤ꧀ꦭꦶꦭꦤ꧀ꦤꦶ꧈ ꦮꦠꦏ꧀ꦫꦏꦥꦢꦸꦏ꧈ ꦔꦱ꧀ꦠꦶꦤꦥꦸꦏꦸꦭꦸꦤ꧀ ꦏꦂꦪꦩꦔꦺꦟ꧀ꦢꦿꦱꦁꦱꦫ꧈ ꦉꦰꦶꦢꦸꦂꦟꦒꦶꦤꦸꦧꦼꦭ꧀ꦥꦸꦫꦶꦃꦔꦥꦸꦱ꧀ꦱꦶ꧈ ꦱꦶꦂꦤꦤ꧀ꦤꦶꦁꦥꦿꦥꦟ꧀ꦝꦮ꧉ ꧃ ꦮꦽꦏꦺꦴꦝꦫꦩꦶꦪꦂꦱꦤꦲꦸꦂꦫꦶ꧈ ꦲꦶꦁꦱꦸꦤ꧀ꦩꦺꦴꦁꦱꦏꦼꦤ꧀ꦤꦲꦢꦺꦤ꧀ꦲꦩ꧀ꦥꦃ꧈ ꦩꦠꦶꦪꦔꦸꦩꦸꦂꦏꦸꦝꦺꦮꦺ꧈ ꦮꦺꦴꦁꦤꦼꦢꦾꦩꦿꦶꦃꦥꦶꦤꦸꦠꦸꦱ꧀ ꦥꦤꦸꦁꦒꦭ꧀ꦭꦺꦲꦾꦁꦩꦲꦱꦸꦕꦶ꧈ ꦲꦂꦪꦯꦺꦟꦱꦏ꧀ꦱꦤ꧈ ꦏꦭꦺꦥꦠ꧀ꦱꦸꦩꦼꦩ꧀ꦥꦿꦸꦁ꧈ ꦯꦿꦶꦟꦫꦺꦟ꧀ꦢꦿꦪꦸꦝꦶꦰ꧀ꦛꦶꦫ ꧈ ꦩꦮꦶꦃꦲꦫꦶꦏꦠꦒꦶꦔꦸꦔꦸꦤ꧀ꦠꦤ꧀ꦱꦶꦥꦶ꧈ ꦭꦶꦂꦠꦶꦤ꧀ꦤꦼꦧꦏ꧀ꦩꦺꦴꦁꦠꦸꦤ꧀ꦤ꧉ ꧃ ꦠꦤ꧀ꦮꦶꦤ꧀ꦤꦂꦤꦏꦁꦏꦫꦶꦥꦿꦶꦃꦲꦠꦶꦤ꧀ ꦏꦮꦸꦮꦸꦱ꧀ꦱꦭꦩ꧀ꦥꦃꦲꦶꦫꦯꦺꦟ꧈ ꦠꦤ꧀ꦥꦮꦢꦾꦲꦩꦸꦁꦝꦺꦮꦺ꧈ ꦩꦸꦁꦧꦗꦿꦱꦶꦟ꧀ꦝꦸꦁꦫꦶꦮꦸꦠ꧀ ꦲꦩ꧀ꦧ꧀ꦧꦼꦧꦼꦤ꧀ꦤꦼꦂꦩꦸꦫꦁꦲꦶꦁꦩꦂꦒꦶ꧈ ꦥꦿꦲꦫꦩꦸꦁꦒꦺꦁꦔꦂꦱ꧈ ꦒꦺꦴꦫꦫꦺꦃꦒꦸꦩꦸꦫꦸꦃ꧈ ꦏꦒꦾꦠ꧀ꦩꦶꦫꦶꦱ꧀ꦮꦺꦴꦁꦥꦢꦺꦱꦤ꧀ ꦏꦁꦏꦲꦩ꧀ꦧꦃꦏꦁꦏꦥꦿꦁꦒꦸꦭ꧀ꦝꦺꦴꦝꦺꦴꦏ꧀ꦲꦗꦿꦶꦃ꧈ ꦲꦟ꧀ꦝꦼꦥꦺꦱ꧀ꦤꦼꦩ꧀ꦧꦃꦤꦼꦩ꧀ꦧꦃ꧉
ꦱꦸꦩ꧀ꦧꦼꦂ ꧇ ꦮꦶꦏꦶꦥꦺꦝꦶꦪꦃ